Më 24–25 mars 2026, në Ludwig-Maximilians-Universität München, u mbajt takimi koordinues i projektit ValuED, në të cilin partnerët e projektit u mblodhën për të reflektuar mbi punën e realizuar gjatë dy viteve të fundit dhe për të përcaktuar hapat e ardhshëm për fazën vijuese të projektit.

Projekti ValuED udhëhiqet nga Fakulteti i Edukimit i Universitetit të Prishtinës. Në këtë takim morën pjesë përfaqësues të institucioneve partnere, përfshirë Fakultetin e Edukimit të Universitetit “Ukshin Hoti” në Prizren, të përfaqësuar nga Prof. asoc. dr. Vedat Bajrami, dekan i Fakultetit të Edukimit, si dhe Prof. ass. dr. Jasmin Jusufi.

Gjithashtu, të pranishëm ishin edhe përfaqësues të Ministrisë së Arsimit dhe Shkencës, Universität Graz, Kosova Education Center (KEC) dhe LMU Munich.

Gjatë takimit u diskutuan çështje të rëndësishme që lidhen me koordinimin e aktiviteteve të projektit, avancimin e kapaciteteve profesionale, ndërhyrjet në shkolla, zhvillimin e udhërrëfyesve institucionalë dhe politikave në fushën e edukimit të bazuar në vlera, trajnimet për mësimdhënës dhe udhëheqës shkollorë, si dhe planifikimin e ndërhyrjeve në shkolla.

Takimi shërbeu si një platformë e rëndësishme për forcimin e bashkëpunimit ndërmjet partnerëve, përafrimin strategjik të aktiviteteve dhe përcaktimin e hapave të ardhshëm në zbatimin e projektit ValuED.

Ky aktivitet u organizu a në kuadër të projektit ValuED, i bashkëfinancuar nga Programi Erasmus+ i Bashkimit Evropian.

Në Universitetin “Ukshin Hoti” Prizren, u zhvillua një takim zyrtar me përfaqësues të bashkëpunimit universitar francez, me qëllim promovimin dhe forcimin e bashkëpunimit akademik ndërmjet universitetit dhe universiteteve franceze.

Prorektorja e Universitetit Prof. Asoc. Dr. Serdan Kervan priti në takim z. Frédéric Deshayes, për bashkëpunim universitar, si dhe znj. Julie Busnel, përgjegjëse e Campus France në Institut Français de Prishtina.

Gjatë takimit u diskutuan mundësitë konkrete për zgjerimin e bashkëpunimit ndërinstitucional, përfshirë mobilitetin e studentëve dhe stafit akademik, shkëmbimet shkencore, si dhe promovimin e programeve të studimit dhe bursave në Francë. Palët shprehën gatishmëri për intensifikimin e bashkëpunimit dhe ndërtimin e partneriteteve afatgjata ndërmjet institucioneve të arsimit të lartë.

Takimi u vlerësua si një hap i rëndësishëm drejt ndërkombëtarizimit të Universitetit “Ukshin Hoti” Prizren dhe krijimit të mundësive të reja akademike për studentët dhe stafin e tij.

Kryetari i Institutit të Gjuhës Turke (Türk Dil Kurumu), Prof. Dr. Osman MERT, më 19 janar 2026 vizitoi programet e mësimit të gjuhës turke në Universitetin “Ukshin Hoti” Prizren.

Gjatë kësaj vizite, Prof. Dr. Osman MERT u prit në takim nga Prorektorja për Bashkëpunim Ndërkombëtar dhe Ngritje të Cilësisë, Prof. Asoc. Dr. Serdan Kervan, si dhe nga Prof. Asoc. Dr. Elsev Brina Lopar, shefe e programit, të cilat mirëpritën vizitën dhe theksuan rëndësinë e bashkëpunimeve akademike dhe institucionale në fushën e gjuhës dhe kulturës turke.

Në vijim, Prof. Dr. Osman MERT u takua me ligjëruesit e programeve të gjuhës turke, me të cilët diskutoi mbi rëndësinë e gjuhës turke, vetëdijen gjuhësore dhe trashëgiminë kulturore, duke shkëmbyer mendime dhe përvoja profesionale.

Po ashtu, Prof. Dr. Osman MERT i dhuroi Universitetit botime të Institutit të Gjuhës Turke, të cilat kontribuojnë në zhvillimin e gjuhës, letërsisë dhe kulturës turke. Në kuadër të kësaj vizite, Universiteti pranoi gjithsej 257 ekzemplarë të veprave të vlefshme nga botimet e TDK-së.

Universiteti “Ukshin Hoti” Prizren shpreh falënderimet e sinqerta për këtë vizitë domethënëse dhe uron vazhdimin e bashkëpunimit në të ardhmen.

—